იდეალური საქართველო
იდეალური საქართველო – ოცნება, რომელსაც ახდენა არ უწერია:
ქვეყანა, სადაც დემოკრატიაა(სადაც ეს სიტყვა მხოლოდ კონსტიტუციაში დაწერილი ტერმინი არ არის). სადაც არ არსებობს ფანატიზმი და არ არსებობენ ფანატიკოსები, რომლებიც მათს მოწინააღმდეგეთ ყელს ღადრავენ განსხვავებული აზრის გამო. სადაც არ არსებობს კამათი რელიგიურ თემაზე, იქ ყველას აზრი მისაღებია, რადგან ყველა ხვდება, რომ ვერავის შეუძლია რამის დამტკიცება. სადაც ეკლესიაში შესვლისას სიმშვიდე და ნეტარება გეუფლება, და ეს ნეტარება თან მიგყვება სახლში, რადგან ეკლესიის ეზოში გაფენილი ფსევდო მორწმუნეებისა და მათი შეყვარებულების გარყვნილ სახეებს არ ხედავ. სადაც გეი პარადი არ იმართება, რადგან ისინი სექსუალურ უმცირესობებად არ მიიჩნევიან. იქ ისინი არიან უბრალო ადამიანები, ჩვეულებრივი ჰორმონალური დარღვევებით, როგორც ქოსა ან მელოტი. სადაც კინოსეანსი, ტელეგადაცემა, ლიტერატურული საღამო თუ გამოფენა არ იშლება იმის გამო რომ ესა თუ ის ხელოვნების ნიმუში ეწინააღმდეგება რელიგიას. იქ ხომ ყველა ხვდება რომ ყველა ზემოთჩამოთვლილი არის ჩვენი ფანტაზიის, ჩვენი მრავალფეროვანი ბუნების, შინაგანი სამყაროს გამოხატულება, ხელოვნება, რასაც კავშირი არ აქვს რელიგიასთან.
ქვეყანა, სადაც ურნას ქუჩაში ცეცხლი არ უკიდია. სადაც მანქანები წითელზე აჩერებენ. სადაც ავტობუსი და მატარებელი თავის დროზე მოდის და მიდის. სადაც ფილმში არავინ იხდის მაყურებელთა მოსაზიდად, რადგან ხალხს მხოლოდ შიშველი სხეული და სექსი არ აინტერესებს. სადაც არ გეშინია პარკში სკამზე ფეხის შემოდება და შეყვარებულისთვის კოცნა, რადგან იცი, რომ არც პოლიციელი მოვარდება და არც ვინმე ჩაგთვლის გარყვნილ ლაწირაკად. აქ ხომ არავის უკვირს როცა ახალგაზრდები ერთმანეთს კოცნიან, რადგან ოდესღაც ყველა იყო ახალგაზრდა, და ყველას უყვარდა, არ უკვირთ, რადგან არავის ჩარჩენია გონება კომუნისტურ ეპოქაში, ეპოქაში, სადაც იდეა, საერთო აზრი, სტერეოტიპი იყო საჭმელიც, სასმელიც, ხელოვნებაც, რელიგიაც და სექსიც.
ქვეყანა, სადაც არ გისჯიან ციხეს საკუთარ სახლში მასტურბირების გამო, რადგან ყველას საკუთარ ცოდვაზე კარგად მოეხსენება. სადაც ქალიშვილობის ინსტიტუტი არ არსებობს, რადგან მის არსებობას აზრი არ აქვს, ის ხომ უბრალოდ უამრავ ახლადდაქორწინებულ ახალგაზრდა მამაკაცს იმედგაცრუებულს ტოვებს და მეტი არაფერი, გამკეთებელი ინსტიტუტით თუ უინსტიტუტოდ, მაინც აკეთებს. სადაც ცოლ-ქმარს სექსი მხოლოდ პირველ ღამეს და ბავშვის გაჩენისთვის არ აქვს. იქ ხომ ხალხმა იცის, რომ სექსი გარყვნილება, სირცხვილი არ არის, რომ როგორც სულს სჭირდება საზრდო, ასევე სხეულიც ითხოვს თავისას. ჩვენ ხომ მხოლოდ ზეციური სულნი არ ვართ. ის ზეციური სული ამქვეყნიურ ცხოველურ სხეულში ბუდობს მიუხედავად იმისა, მოსწონს ადამიანებს ეს თუ არა.
ქვეყანა, სადაც სხვის ცხოვრებაში ხელის ფათური არ მოსულა. სადაც პრესას ფერი არ აქვს. სადაც ტელევიზორში არ თარგმნიან გადაცემებს. იქ ხომ ჭკვიანი ხალხი ცხოვრობს, რომელთაც უცხოურის დაკოპირებას ურჩევნიათ საკუთარი გონების ნამოქმედარი ნახონ, შეაფასონ საკუთარი შესაძლებლობები.
ქვეყანა, სადაც გრძელ თმას(მამაკაცზე) ხალხი პირდაღებული არ შესცქერის. სადაც წიგნს იმიტომ არ კითხულობენ რომ შემდეგ სადღაც ახსენონ მისი სათაური და ისიც რომ ის წაუკითხავთ. სადაც იმიტომ არ უყვართ, რომ სიყვარული მოდაშია. სადაც მე ვარ მე და შენ ხარ შენ და არავის სჭირდება თვალთმაქცობა. სადაც შენი ეროვნება, რელიგიური მრწამსი, კანის ფერი, ჩაცმულობა, სექსუალური ორიენტაცია, ვარცხნილობა, საყვარელი მუსიკალური ჟანრი არ დგება შენსა და სხვას შორის. სადაც მთავარია პიროვნება, მთავარია ადამიანი…
by Gtrup